ခါးပိုက်နှိုက်အဖွဲ့ ဖမ်းမိ

ရန်ကုန်၊ အောက်တိုဘာ ၁၇

ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ တပ်ဖွဲ့ဝင်များသည် ခါးပိုက်နှိုက်မှု၊ ခိုးမှု၊ လုယက်မှုများ ဖော်ထုတ်ဖမ်းဆီးရမိရေးအတွက် သတင်းစုံစမ်းဆောင်ရွက်ခဲ့ရာ မြို့နယ်များအတွင်း အငှားယာဉ်ဖြင့် လှည့်လည်သွားလာကာ ခါးပိုက်နှိုက်မှုများ ကျူးလွန်သောအဖွဲ့ရှိကြောင်း သတင်းရရှိသဖြင့် ဖမ်းဆီးရမိရေးအတွက် ၁၂.၁၀.၂၀၁၅ရက်နေ့ ၀၃၃၀ အချိန်တွင် မြောက်ဥက္ကလာပမြို့နယ်၊ သုဓမ္မာလမ်းမကြီး၊ ကန်သာယာကားမှတ်တိုင်၌ စောင့်ကြည့်စုံစမ်းနေစဉ် မှတ်တိုင်သို့ဆိုက်ရောက် လာသော အမှတ်(၄၃)ယာဉ်လိုင်း ဒိုင်နာခရီးသည်တင် ယာဉ်ပေါ်မှ ခါးပိုက်နှိုက်ပြစ်ချက်ဟောင်းရှိသူများဖြစ်ကြသည့် ရွှေပြည်သာမြို့နယ်နေ ဆင်ပေါက်(ခ)သိန်းဝင်း၊ (၆၂)နှစ်၊ ကုလား(ခ)အောင်မင်းခိုင်၊ (၃၄)နှစ်၊ လှိုင်သာယာမြို့နယ်နေ တောပေါက်(ခ)ပြည့်စုံ၊ (၂၃)နှစ်၊ ၀တုတ်(ခ)နေမျိုးဦး၊ (၃၂)နှစ်၊ အလတ်ကောင်(ခ)မြတ်မင်းထွန်း၊ (၃၆)နှစ်တို့ (၅)ဦးမှာ ဆင်းလာပြီး ဒိုင်နာခရီးသည်တင်ယာဉ်၏နောက်မှ မောင်းနှင်လိုက်ပါလာသော DD----- Probox အငှားယာဉ်ဖြင့် ထွက်ခွာသွားသည်ကိုတွေ့ရှိရသဖြင့် ၎င်းအငှားယာဉ်အား ရပ်တန့်စစ်ဆေးခဲ့ပါသည်။

ထိုသို့စစ်ဆေးခဲ့ရာ ယာဉ်မောင်းမှာ ဖြူတုတ်(ခ)လှိုင်မျိုးဝင်း၊ (၂၂)နှစ်၊ လှိုင်သာယာမြို့နယ် နေသူဖြစ်ပြီး ဆင်ပေါက်(ခ)သိန်းဝင်းပါ (၅)ဦးတို့၏ ကျောပိုးအိတ်များအား စစ်ဆေးရှာဖွေရာ တောပေါက်(ခ)ပြည့်စုံလွယ်ထားသည့် ကျောပိုးအိတ်အတွင်းမှ ငွေကျပ် (၁၁၅၀၀၀)အားတွေ့ရှိရကာ အဆိုပါငွေများမှာ အမှတ်(၄၃)ဒိုင်နာယာဉ်ပေါ်ပါ အသက်(၄၀)နှစ်ခန့်ရှိ ခရီးသည် အမျိုးသား (၁)ဦး၏ဘေးလွယ်အိတ်အတွင်းမှ ၎င်းတို့အတူတကွနှိုက်ယူရရှိခဲ့သော ငွေများဖြစ်ကြောင်း ပေါ်ပေါက်ခဲ့ပါသည်။

ပေါ်ပေါက်ချက်များအရ ၎င်းတို့(၆)ဦးထံမှ ခါးပိုက်နှိုက်ရာတွင် အသုံးပြုသော ကျောပိုးအိတ်များ၊ နှိုက်ယူရရှိခဲ့သည့်ငွေကျပ် (၁၁၅၀၀၀)နှင့် DD----Probox ယာဉ်တို့အား သိမ်းဆည်းကာ မြောက်ဥက္ကလာပမြို့မရဲစခန်း(ပ) ၈၀၆/၂၀၁၅၊ ပြစ်မှုပုဒ်မ ၃၇၉(နှိုက်)/၅၄ဖြင့် အရေးယူဆောင်ရွက်ခဲ့ပါသည်။

၎င်းတို့အား အခြားခါးပိုက်နှိုက်မှုများ ကျူးလွန်ထားခြင်း ရှိမရှိ စစ်ဆေးခဲ့ရာ ဆင်ပေါက်(ခ) သိန်းဝင်းနှင့် အလတ်ကောင်(ခ)မြတ်မင်းထွန်းတို့ (၂)ဦးသည် ၂၂.၅.၂၀၁၅ရက်နေ့ နေ့လယ်အချိန်က အောင်မင်္ဂလာအဝေးပြေးမှ လှိုင်သာယာမြို့နယ်သို့ပြေးဆွဲသည့် အမှတ်(၄၃)ယာဉ်လိုင်း ဒိုင်နာခရီးသည်
တင်ယာဉ်ပေါ်တွင် ခရီးသည်အမျိုးသား(၁)ဦး၏ကျောပိုးအိတ်အတွင်းမှ ရွှေလက်ကောက် (၆)ကွင်းကို နှိုက်ယူခဲ့ပြီး ပေါင်နှံထားကြောင်းပေါ်ပေါက်ခဲ့ ပါသည်။

ယင်းသို့ပေါ်ပေါက်ချက်အရ အဆိုပါနေ့က ဧရာဝတီတိုင်းဒေသကြီးနေ ဦးသန်းမြင့်သည် အမှတ်(၄၃) ယာဉ်လိုင်းဒိုင်နာခရီးသည်တင်ယာဉ်အား စီးနင်းလာစဉ် ၎င်း၏ ရွှေလက်ကောက်(၆)ကွင်းကို ခါးပိုက်နှိုက်ခံရ၍
မြောက်ဥက္ကလာပမြို့မရဲစခန်းတွင် တိုင်တန်းထားရှိသော (ပ)၄၀၂/၂၀၁၅၊ ပြစ်မှုပုဒ်မ ၃၇၉(နှိုက်)အမှုအား ကျူးလွန်ခဲ့ခြင်းဖြစ်ကြောင်း ဖော်ထုတ်နိုင်ခဲ့ပြီး သက်သေခံရွှေ လက်ကောက်(၆)ကွင်းကို ပြန်လည်သိမ်းဆည်းနိုင်ခဲ့ကာ အမှုဖြင့် ဆက်လက်အရေးယူ ဆောင်ရွက်လျက်ရှိကြောင်း သတင်းရရှိပါသည်။

Yangon Police
https://www.facebook.com/yangonpolice